Ճանաչողական այցով Գյումրիում էր Հայաստանում Ճապոնիայի արտակարգ և լիազոր դեսպան Մասանորի Ֆուկուշիման:
Գյումրի համայնքի ղեկավար Վարդգես Սամսոնյանն այսօր՝ փետրվարի 24-ին, ընդունել է Հայաստանում Ճապոնիայի դեսպան Մասանորի Ֆուկուշիմանին: Վարդգես Սամսոնյանը ողջունել է դեսպանի այցը Գյումրի, ներկայացրել քաղաքն իր պատմությամբ, մշակույթով, խոսել տարբեր ոլորտներում Գյումրու ունեցած ներուժի մասին:

Գյումրի համայնքի ղեկավարի տեղակալ Դավիթ Առուշանյանը նախօրեին եղել է Գյումրու սննդի շուկայի տարածքում, տեղում ծանոթացել բացօթյա առևտրի և դրա իրականացման ընթացքին առնչվող հարցերին: Դավիթ Առուշանյանի հետ եղել է նաև ՀՀ կառավարությանն առընթեր սննդի անվտանգության տեսչության Շիրակի մարզային վարչության պետ Արտուշ Հովհաննիսյանը: Համայնքի ղեկավարի տեղակալը զրուցել է առևտուր իրականացնող քաղաքացիների հետ, խոսել խնդրի կարգավորման այլընտրանքային լուծումների և բազմաթիվ այլ հարցերի մասին:

Շիրակի մարզպետ Նազելի Բաղդասարյանը և Գյումրի համայնքի ղեկավար Վարդգես Սամսոնյանը փետրվարի 14-ին հանդիպում են ունեցել Ուզբեկստանի Հանրապետությունում Հայաստանի Հանրապետության արտակարգ և լիազոր դեսպան Արամ Գրիգորյանի հետ։ Հանդիպման ընթացքում կողմերը խոսել են հնարավոր համագործակցությունների, առկա կապերի ընդլայնման և մի շարք այլ հարցերի մասին: Հանդիպման ընթացքում նաև պայմանավորվածություն է ձեռք բերվել՝ Գյումրի և Սամարղանդ քաղաքների միջև կնքել քույր քաղաքներ հռչակելու մասին համաձայնագիր։ Համաձայնագրի կնքման փաստաթղթային գործընթացն արդեն ընթացքի մեջ է:

Փետրվարի 14-ին Գյումրիում էին քաղաքաշինության կոմիտեի նախագահ Արմեն Ղուլարյանը և քաղաքաշինության կոմիտեի բնակարանային ֆոնդի կառավարման և կոմունալ ենթակառուցվածքների վարչություն պետ Տանյա Արզումանյանը: Վերջիններս Շիրակի մարզպետ Նազելի Բաղդասարյանի և Գյումրի համայնքի ղեկավար Վարդգես Սամսոնյանի ուղեկցությամբ եղել են Գյումրու Անտառավան 3-րդ թաղամաս 26 և Տիգրան Մեծ 5 վթարային շենքերի տարածքում, տեղում ուսումնասիրել շենքերում առկա իրավիճակը, քննարկել դրանց հետագա ճակատագիրը, խոսել խնդիրների կարգավորման համար անհրաժեշտ միջոցների և առաջիկա անելիքների մասին: