Նոյեմբերի 20-ին Գյումրու քաղաքապետ Սամվել Բալասանյանն ընդունեց Վաշինգտոնի Համաշխարհային Բանկի ներկայացուցիչ Մարինա Պետրովիչին, Համաշխարհային Բանկի հայաստանյան գրասենյակի ներկայացուցիչ Ալեսքանդր Հովհաննիսյանին, «Առաքելություն Հայաստան» բարեգործական հասարակական կազմակերպության նախագահ Հռիփսիմե Կիրակոսյանին, ինչպես նաև «Հայաստանի աղքատ և կարիքավոր անձանց կենսամիջոցների բարելավում» ծրագրի պատասխանատուների: 2013թ. մարտին մեկնարկած ծրագրի շրջանակներում, որն իրականացվում է Երևանում և Հայաստանի 5 մարզերում (այդ թվում` Շիրակի մարզում), նպատակ է դրված 16 համայնքների շուրջ 4.000 անապահով, աղքատ և հաշմանդամություն ունեցող անձանց համար կենսապայմանների բարելավում և զբաղվածության խնդրի լուծում: Ծրագիրն իրականացվում է ՀՀ Աշխատանքի և Սոցիալական հարցերի նախարարության, Ճապոնիայի կառավարության, Համաշխարհային Բանկի և «Առաքելություն Հայաստան» բարեգործական հասարակական կազմակերպությունների միջոցով: Այս նպատակով դրամաշնորհային ծրագրի շրջանակներում ակնկալվում է աշխատանքային 3 առանցքային ուղղություններ` զբաղվածության խնդրի լուծում (այդ թվում նաև` ուսուցողական-կրթական), սոցիալ-առողջապահական կարիքների բարելավմանն ուղղված ծրագրեր (այդ թվում նաև` բարեգործական ճաշարաններ), ինչպես հաշմանդամություն ունեցող անձանց համար ներառական միջավայրի ստեղծում: «Հայաստանի աղքատ և կարիքավոր անձանց կենսամիջոցների բարելավում» ծրագրի պատասխանատուները քաղաքապետին ներկայացրեցին ծրագրի հիմադրույթները` կարևորելով քաղաքային իշխանությունների հետ համագործակցությունը: Ծրագրով նախատեսվում է ծրագրի ծախսերի 20-30 տոկոսի չափով տեղական ինքնակառավարման մարմինների ֆինանսական մասնակցություն: Սամվել Բալասանյանը ողջունեց նման ծրագրերի իրագործումը Գյումրիում, որտեղ կան հաշմանդամություն ունեցող շատ անձինք, սակայն, ըստ նրա, քաղաքային բյուջեից հնարավոր չէ մեծ հատկացումներ: Այս նպատակով Սամվել Բալասանյանն առաջարկեց համատեղ աշխատել քաղաքապետարանի համապատասխան բաժինների, ինչպես նաև քաղաքապետին կից հաշմանդամների հարցերով զբաղվող հանձնաժողովի հետ: Հանդիպման վերջում Համաշխարհային Բանկի Վաշինգտոնյան ներկայացուցիչը քաղաքապետին համառոտ ներկայացրեց նաև Գյումրիում սպասվելիք ծրագրերի մասին, որոնք նախատեսվում են հաջորդ տարում: