Ապրիլի 24-ին  Հայոց Եղեռնի 103-րդ տարելիցի օրը, Շիրակի թեմի առաջնորդ Միքայել եպիսկոպոս Աջապահյանը, Շիրակի մարզպետ Արթուր Խաչատրյանը, Գյումրու քաղաքապետ Սամվել Բալասանյանը, մարզային ու քաղաքային իշխանության այլ ներկայացուցիչներ այցելեցին Հեր Հերի (Ջարդի) ձոր՝ հարգանքի տուրք մատուցելու Ցեղասպանության անմեղ զոհերի հիշատակին: Սամվել Բալասանյանն իր խոսքում անդրադառնալով Ցեղասպանությանն, իր խոսքում կարևորեց դրա ճանաչումը մեր հարևան պետության Թուրքիայի կողմից, որպեսզի հետագայում բացառվեն ցեղասպանությունները:

Սիրելի հայրենակիցներ,

Համայն հայությունն այսօր ոգեկոչում է Հայոց ցեղասպանության սուրբ նահատակների հիշատակը: Մեկ դարից ավելի է անցել այն օրից, երբ Օսմանյան Թուրքիայի կողմից ծրագրվեց և իրագործվեց սարսափելի ոճրագործություն, որին զոհ դարձավ 1.5 մլն հայ: Հայոց ցեղասպանությունը ոճիր է ոչ միայն հայ ժողովրդի, այլեւ համայն մարդկության դեմ, իսկ ցեղասպանության ճանաչումն ու դատապարտումը կարեւոր է ոչ միայն Հայաստանի, այլև ամբողջ քաղաքակիրթ աշխարհի համար: 1915 թվականին Օսմանյան կայսրությանը չհաջողվեց ոչնչացնել հայությանը, այսօր առավել ևս չի հաջողվի լռեցնել ճշմարտության ձայնը, ջնջել հայի ինքնությունն ու հիշողությունը: Հանուն արդարության կայացման և մարդկության դեմ նման վայրագությունների բացառման համար, հայի կողքին պայքարել ու շարունակում են իրենց պայքարը բազում պետություններ: Վստահ եմ՝ վաղ թե ուշ Թուրքիան առերեսվելու է իր պատմության արյունալից էջերին, համապատասխան գնահատականի արժանանալով իր հրեշավոր հանցանքի համար: Ոգեկոչելով Հայոց ցեղասպանության զոհերի հիշատակը՝ իմ խորին հարգանքն եմ բերում հայ ժողովրդի անմեղ զոհերին, հայ ազգին մաղթելով խաղաղություն, միասնականություն և անկոտրում կամք:

Ապրիլի 16-ին Գյումրու քաղաքապետարանում տեղի ունեցավ Գյումրի քաղաքի Աբովյան (Քըրք Քըրքորյանի) փողոցում Հայաստանի ազգային հերոս Քըրք Քըրքորյանի արձանը տեղադրելու մասին հանրային լսում-քննարկում: Քննարկումը վարում է Գյումրու քաղաքապետի առաջին տեղակալ Ռուբեն Սանոյանը: Քննարկմանը մասնակցում էին մշակույթի ոլորտի ներկայացուցիչներ, շահագրգիռ այլ անձիք՝ տարբեր ոլորտներից: Քննարկման սկզբում Ռուբեն Սանոյանը խոսեց ծնունդով գյումրեցի ամերիկաբնակ Գրիգոր Բեդիրյան կողմից ներկայացված առաջարկի և դրան առնչվող մի շարք հարցերի մասին: Հանրային լսում-քննարկմանը խոսվեց հայ մեծ բարերար, Հայաստանի ազգային հերոս Քըրք Քըրքորյանի՝ Գյումրիում ներդրած ավանդի մասին, այնուհետ հնչեցին տարբեր կարծիքներ արձանի տեղադրման վայրի և մի շարք այլ հարցերի առնչությամբ:

Ապրիլի 12-ին  Գյումրու քաղաքապետ Սամվել Բալասանյանն ընդունեց «ԱՌԴԱ» բարեգործական հիմնադրամի ներկայացուցիչներին: Կողմերը խոսեցին Գյումրու քաղաքապետարան-«ԱՌԴԱ» հիմնադրամի հետ համագործակցության շարունակության, դրա արդյունքում սոցիալական նոր բնակարանների կառուցման և մի շարք այլ հարցերի մասին: «ԱՌԴԱ» հիմնադրամի ներկայացուցիչների վստահեցմամբ ապրիլի 25-ից կտրվի շինաշխատանքների մեկնարկը և ևս 12 սոցիալական բնակարան կհանձնվի շահագործման: Բնակարանների կառուցման գործում, այս անգամ ևս քաղաքապետարանը կունենա իր ներդրումը՝ 15%-ի չափով: