Հունիսի 25-ին Եվրոպական հրապարակում՝ Գյումրու «Սև Բերդ» ամրոցի տարածքում, Գյումրու քաղաքապետ Սամվել Բալասանյանի նախաձեռնությամբ բացվեց հուշակոթող, որին ներկա էին Հայաստանի, Վրաստանի, Ռուսաստանի և Արևելյան Եվրոպայի հայ կաթողիկեների առաջնորդ Ռաֆայել Արքեպիսկոպոս Մինասյանը, Շիրակի թեմի առաջնորդ Միքայել եպիսկոպոս Աջապահյանը, Շիրակի մարզպետ Արթուր Խաչատրյանը, մարզային ու քաղաքային իշխանության, մշակույթի ոլորտի ներկայացուցիչներ, հյուրեր: Հուշակոթողն իրենից ներկայացնում է փակ խորան, որտեղ տեղադրված է այն նույն սեղանը, որի մոտ 2016 թվականի հունիսի 25-ին Ֆրանցիսկոս պապի ձեռամբ պատարագ մատուցվեց Գյումրու Վարդանանց հրապարակում: Խորանի կենտրոնում «Աստվածամայրը մանուկ Հիսուսի հետ» նկարն է, որի հեղինակը գյումրեցի գեղանկարիչ Ժակլինա Սարգսյանն է, իսկ ներսում՝ Պապի այցի մասին պատմող լուսանկարներ են փակցված: Խորանի մոտ տեղադրված է նույն այն խաչքարը, որ դրված էր բեմում 2016 թվականի հունիսի 25-ի: 
Շիրակի թեմի առաջնորդ Միքայել եպիսկոպոս Աջապահյանն իր խոսքում ընդգծեց, որ Հռոմի պապի այցից մեկ տարի անց քաղաքապետը բոլորիս վերհուշի բերեց՝ նախաձեռնելով հուշակոթողի կառուցումն ու բացումը: Ռաֆայել Արքեպիսկոպոս Մինասյանն իր խոսքում ողջունելով ներկաներին՝ շնորհակալություն հայտնեց Սամվել Բալասանյանին նախաձեռնության համար, որն այսուհետ բոլորին կպատմի Հռոմի պապի Գյումրի կատարած այցի, մատուցած պատարագի մասին: Քաղաքապետն անդրադառնալով հուշակոթողի բացմանը՝ նշեց, որ մենք պարտավորված էինք Հռոմի պապի այցի պատմությունը կերտելու և գալիք սերունդներին փոխանցելու, ինչն այսուհետ իրողություն է: Ողջույնի խոսքով հանդես եկան նաև Շիրակի մարզպետ Արթուր Խաչատրյանը և մարզպետի խորհրդական Հասմիկ Կիրակոսյանը:

Հունիսի 24-ին Գյումրու Սև Բերդ ամրոցում տեղի ունեցավ «Հրաժեշտ մանկապարտեզին» միջոցառումը, որին ներկա էր Գյումրու քաղաքապետի առաջին տեղակալ Ռուբեն Սանոյանը: Արդեն ավանդույթ դարձած ամենամյա միջոցառմանը մեծ ոգևորությամբ նախապատրաստվել էին ինչպես նախադպրոցական ուսումնական հաստատությունների աշխատակիցները, այնպես էլ փոքրիկներն ու նրանց ծնողները: Գյումրու 22 նախադպրոցական ուսումնական հաստատությունների մոտ 720 սան հայկական ժողովրդական, ժամանակակից ու դասական երգ երաժշտության ներքո ներկայացրեցին իրենց պարային համարները: Ռուբեն Սանոյանը շնորհավորեց երեխաներին, դաստիարակներին և ծնողներին կատարված աշխատանքի համար՝ ընդգծելով նախադպրոցական կրթության դերը երեխաների համար` միաժամանակ բարի երթ մաղթելով փոքրիկներին կյանքի նոր փուլում:

Հունիսի 1-ին Գյումրու քաղաքապետ Սամվել Բալասանյանը, քաղաքապետի առաջին տեղակալ Ռուբեն Սանոյանը, փոխքաղաքապետ Վաղարշակ Մխիթարյանը, քաղաքային իշխանության այլ ներկայացուցիչներ այցելեցին Գյումրու «Լապտերիկ» մանկապարտեզ, մասնակցեցին մանկապարտեզի սաների մասնակցությամբ կազմակերպված միջոցառմանը: Քաղաքապետը ողջունելով ներկաներին, շնորհավորեց բոլոր փոքրիկներին Երեխաների իրավունքների պաշտպանության միջազգային օրվա առթիվ, իր խոսքում փոքրիկներին մաղթելով անհոգ ու լուսավոր մանկություն: Քաղաքապետը միաժամանկ ընդգծեց՝ անելու են հնարավորը նրանց համար լավագույն պայմաններ ապահովելու համար: Կազմակերպված միջոցառումից հետո ներկաները շրջեցին մանկապարտեզի ներսում, որտեղ ամերիկահայ բարերար Հովհաննես Բալայանի և  «Ծնողազուրկ և հաշմանդամ երեխաների Սուրբ ծնունդի» հիմնադրամի   նախաձեռնությամբ իրականավցել են վերանորոգման աշխատանքներ:

   Հունիսի 1-ին Գյումրու քաղաքապետ Սամվել Բալասանյանը, քաղաքապետի առաջին տեղակալ Ռուբեն Սանոյանը, փոխքաղաքապետ Վաղարշակ Մխիթարյանը, քաղաքային իշխանության այլ ներկայացուցիչներ այցելեցին Գյումրու «Ժպիտ» մանկապարտեզ: Մանկապարտեզ էին այցելել նաև Հայաստանում հավատարմագրված մի շարք դեսպանների կանայք՝ գլխավորությամբ «Բարի գալուստ Հայաստան» դիվանագիտական ասոցիացիայի նախագահ Նատալիա Նալբանդյանի: Մանկապարտեզի սաների մասնակցությամբ կազմակերպված միջոցառման ընթացքում Գյումրու քաղաքապետ Սամվել Բալասանյանը ողջունելով ներկաներին, շնորհավորեց բոլոր փոքրիկներին Երեխաների իրավունքների պաշտպանության միջազգային օրվա առթիվ: Քաղաքապետն իր խոսքում փոքրիկներին մաղթեց անհոգ ու լուսավոր մանկություն, միաժամանկ ընդգծելով, որ անելու են հնարավորը նրանց համար լավագույն պայմաններ ապահովելու համար: 
Արտաքին գործերի նախարարությանը կից գործող «Բարի գալուստ Հայաստան» դիվանագիտական ասոցիացիայի նախաձեռնությամբ, Կանադայում Հայաստանի արտակարգ և լիազոր դեսպան Արմեն Եգանյանի ջանքերով և կանադահայ բարերար Ռիչարդ Սևազլյանի ֆինանսական աջակցությամբ «Ժպիտ» մանկապարտեզի մի մասնաշենքում արդեն իսկ իրականացվել են վերանորոգման աշխատանքներ: Ասոցիացիայի նախաձեռնությամբ մանկապարտեզում շարունակվում են վերանորոգման աշխատանքները: Ներկայումս իրականացվում է ևս երկու խմբասենյակի վերանորոգում, որի ֆինանսական աջակցությունը տրամադրել է Հայաստանում Չինաստանի դեսպանությունը: