Սիրելի՛ հայրենակիցներ,
Հայրենական մեծ պատերազմի վետերաններ, Արցախյան ազատամարտի հարգելի մասնակիցներ, շնորհավորում եմ Ձեզ մայիսյան փառապանծ տոների կապակցությամբ: Իմ շնորհավորական խոսքն եմ հղում նաև երկրապահներին, քանի որ 1997 թվականից ի վեր մայիսի 8-ին նշում ենք նաև երկրապահների օրը:
Հայրենական Մեծ պատերազմում խորհրդային բանակը տարավ փայլուն հաղթանակ: Այդ օրերին մեր հայրենակիցները, այլ ժողովուրդների հետ համատեղ, կրեցին պատերազմի ամբողջ ծանրությունն ու դժվարությունը՝ իրենց անձնուրաց պայքարով մեծ լումա ներդնելով սպասված հաղթանակի կայացմանը:
Արդեն 1992 թվականին հայ կամավորականներն ազատագրեցին Շուշին՝ այս օրն առավել նշանակալի դարձնելով հայ ժողովրդի համար: Շուշիի ազատագրումը ուղղակի հաղթանակ չէր, այլ վճռական բեկում՝արցախյան պատերազմում: Դժվարին մարտերում հայերի տարած հաղթանակները վառ վկայությունն են հայ զինվորների հայրենասիրության և նվիրվածության, անկոտրում ոգու և կամքի: Այսօրը ևս մեկ առիթ է մեր խոնարհումը բերելու եւ հարգանքի տուրք մատուցելու բոլոր այն հերոսներին, որոնց անկոտրում կամքի, արիության, անձնուրաց պայքարի արդյունքում մեզ տրվել է ազատ հայրենիքում ապրելու իրավունք:
Եվս մեկ անգամ շնորհավորում եմ Հայրենական մեծ պատերազմի վետերաններին, Արցախյան ազատամարտի մասնակիցներին, երկրապահներին՝ մաղթելով նրանց քաջառողջություն, բարեկեցություն, խաղաղ երկինք: Թող բոլոր ժամանակներում հային ուղեկից լինեն անկոտրում կամքն ու մարտական բարձր ոգին:
Գյումրու քաղաքապետ՝ Սամվել Բալասանյան